MIHRING DAMKHAWCHHUAH NANA TUIHNA SIAM RAMNGAW HUMHALH

Mihringte dam khawchhuah nan tuihna siam ramngaw humhalh

 

Mangvunga

 Mipa fa-a piang tawh phawt in a kan mamawh ber pahnih thlang rawh? tih

zawhna hi dawng ta ila chuan Tui leh Ramngaw tiin ka sawi ngei ang. Mihring

nunna atan an pawimawh ber reng a ni. Ramngaw tello leh tui tello in mihring te

hi karkhat pawh nung thei na ngut maw? Mihring nunna hnâr ber, kan ei leh in leh

kan châk khài lakna ber tun dinhmun a kan suasam dan han ngaihtuah hian a

lungawi thlak lemloh hle. Tunṭum ah hian Mihring dam khawchhuah nan tuihna

siam/ramngaw humhalh tih hi Mizoram bulṭhut a hmangin rawn tarlan ka tum

dawn a ni.

 Mizoram ah hian tunhnai chho ah hian tui harsat na kan tawk nasa hle,

thingtlang khaw ṭhenkhat ah phei chuan mahni hna ṭul ṭhulh ṭhak khawpin

tuikhurah tuikang ngahchhuah a ngai fo. Tui kan harsa tlang, hengte hi engdang

vang a thleng ani lo, ramngaw kan humhalh ṭhat tawk loh vang leh kan tui lakna

hnar te kan dimdawi ṭhat tawk loh vang ni berin alang. Tun dinhmun ah hian abik

takin Tui lampang ah hian Mizoram hi kan dinhmun a ṭhalo hle niin alang. May 23,

2021 DD News Mizoram in feature story an rawn siam aṭang hian alang chiang hle

awm e. He feature ah hian Aizawl khawpui châwmtu ber Tlawng hi kum tin 6% zel

in a kang tih ka hre thei, chu mai a ni nem 29 april 2019 Tlawnga tui luang tam lam

chu litre maktaduai 70 niin chu chu 2019 a tlem ber ṭum a ni, kum 2020 April ni 1

vekah chuan litre maktaduai 65 ni leh in heihi a tlem lai ber a ni leh bawk a, tin tun

kum 2021 April 19 khan litre maktaduai 31 a ni ta mai! Tlawngah hian tui pump

turin tui litre maktaduai 80 vela awm reng angai kumin ṭhalah chuan tui pump tur

mamawh chanve pawh a awm tling ta lo tih kan hre thei. 30 March 2021 Vanglaini

daily newspaper ah vek chuan PHE department chuan tunah hian Aizawl

khawpuiah hian mipui 40000 vel hnenah tui sem mek angin an chhut a, tuna tui

pump theih zat aṭanga chawhrualin nikhatah mi pakhat hnehah tui litre 40 vel zel

pe ang an nih thu leh mipui khamkhawp a nih loh thu an sawi. Mihring dam

khawchhuah nana pawimawh ber te zing ami hetiang taka kan tlachham chho ṭan

ta mai hi keimahni hian kan dimdawi tawk loh vang a ni a, tuna insiamṭhat na hun

la awm ah hian kan harchhuah vat a kan tuihnar kang chat lek lek hi kan tuaihnum

thar a ngai hle. Hetiang zela kan kal chuan tun aṭang a kum 5 ah khawia tui nge

kan hman tak ang? Hmanlai ti ila kum 2012 vel chho khan tun ang em em hian tui

kan la harsa lo, PHE department pawn thawh tur an nei mang lo. Tunhnai ah erawh chuan PHE department a thawktute hi an indaihlo in an buai em em. PHE

Department chinchiah danin kum 2012 Mizoram khua 745 ah khua 66 in tui

khamkhawp hman tur an nei zo lo, tunkum ah erawh chuan khaw 350 teh meuh

in tui kham khawp hman tur an nei ta lo. Tuihna kan siamthar ava ngai tehreng

em. Kan dinhmun chhiat tawh dan hi I hria ang tiraw?

 Heng tui hnar a insak na leivung kan han paih vak vak ṭhin te hi tuihna

siamthar kan tum anihchuan kan sim a ṭul hle ang. Tin hetiang tilui te hi kan lui

kam leh tuihna te humhalhna tur bill kan neih te pawh hi kan sawrkar hian khauh

takin keng kawh ngam se chuan a lawmawm in a ṭha ngawt ang. Indian Penal

Code section 277 ah phei chuan mi tupawhin ama duh thu ngei a vantlang tuikhur

emaw tuipui tlan ṭhin a tibawlhhlawh a nih chuan hremna chu thla thum chhung

tantir emaw pawisa chawitir emaw a pahnih a hrem kawp theih anni tiin a in ziak

hial anihkha. Mipui te hian dan te hi pawisâ ila tu tan mah nilo keimahni tan vek a

ni tih hre thar lehzual ila a lawmawm lehzual ngawt ang. Tin dán hlauh vanga ti

bawlhlawhlo nilo in keimahni tan aṭhalo tih hre reng chungin kan luidung te kan

tuihna te hi kan humhalh a ṭul takzet. Heng kan bawlhhlawh pai dan te kan

fimkhur a, lui tui te kan tih bawlhhlawh loh phot chuan tuihna kan siam ve zel

tihna alo ni reng mai. Tun aṭang hian sustainable development hi kan kalpui ṭan

angai hle bawk, kan hla phuah tu’n “kan Zotlang ram nuam chhawrpial run I iang

e” an tih a chhawrpial run tichhe tu generation nih I tum lo hram ang u. Tun aṭang

a kan ram leilung hauhsak na te hi ren chêm hauh loa kan hman huau huau chuan

kan tu leh fate lo la awm tur te hian enge an hman tak ang? kan tu leh fate tan tal

pawh kan ram leilung humhalh hi kan tihmakmawh a ni, tun aṭang hian kan tu leh

fate tan leh keimahni tan tuihna I siam ang u hmiang?

 

4th May 2021 Vanglaini daily news paper a ka thil chhiar chuan min va

tilawm kher em “Project save tlawng Lunglei ṭhalai pawl te chuan Tlawng lui, a

bikin a hnar lam humhalh kawngah hmalakna mumal zawk neih ṭulin an hria a,

22nd April 2021 khan mumal zawk neih theih nan group an din hial a, Project Save

Tlawng a lo piang ta. Member pawh 500 bawrin an zawm der tawh, an zawm belh

zel pawh a rinawm, lo lian thur thur rawh se” tih thu ka han chhiar zet kha chu ṭha

ka ti narawh e. Hetiang pawl hi din belh zel se a duhawm khawp mai, lo din zel

rawh u mipuite pawh hian kan thlawp zel ang che u, tun aṭang hian kan humhalh

loh chuan kan tui hnar te hian min kang san mai dawn. I harh ang u khua ala tlai lo Tunhnaiah Leng khua chuan Ministry of Jal Sakti leh PHE Department

buatsaih North East tuihna humhalh ṭha ber lawmman Best Village Panchayat

lawmman an dawng a, Leng khua hian an ti ṭha in an entawn tlak tak meuh meuh.

Leng khua hian 2013 chho aṭang daih tawhin Tuihna humhalh Sub-committee an

lo din der tawh! Leng khua hian hmangchang an hria in an fing em em a, anni

chuan Fur tui luang ral mai tur dan nan contour trench- siamna chang te an hria.

Heng te hi Mizorama khaw hrang hrang te hian entawn ila aṭha ngawt mai, tuihna

siam tura kan tihtheih tlem te zinga mi a ni si a. Tunah pawh Leng khua chuan an

khaw tui khamkhawp mai nilo in hralhchhuah tling hial khawp tuihna an lo nei ta.

Leng khua in a ṭan an lak ang hian Mizoram mipuite zawng zawng hian ṭan la ve

tak tak ila chuan tui harsatna hi kan pumpelh mai lo’ang maw?

 Tui hi kan nunna atan a pawimawh ber te zing ah pawh pawimawh fal

khawp hial a pawimawh a ni. Tun anga kan kal zel chuan tun aṭanga kum 10 emaw

20 ah chuan tui hman tur thianghlim hi avang pharh tawh in a rinawm. 11th

President of India A.P.J. Abdul Kalam vision 2070 ah chuan “ kum 2070 ah chuan

khawlaia tui ṭin khat inchuh a silai hmang a inbeih chu thil pangai angin kan ngai

tawh ang” a ti hial anihkha chu a vision rawn tarlan tlem te ka han tarlang ve ang

e, amah chuan tihian a sawi “ hman ah kan naupan lai chuan puitling pakhat tan

tui no 8 tal intur a nih laiin tunah chuan no khat bak inphal a ni tawhlo,

thawmhnaw suk na tur tui a awm tawhloh avangin hak zawh a paih nghal mai

theih tur vek kan ha tawh a, chu chuan bawlhlawh a tipung in mihring te tan

harsat na tam tak min siam, tuiin tur khamkhawp kan hmuh tawhloh avangin kum

20 mi pawn kum 40 hmel ang vek an pu tawh, tunah chuan mihringte hnathawh

pui ber pawh tuihna thlitfim anihtawh thu leh mihring khamkhawp thlitfim ahar

chu thil harsa a ni tawh” tiin a sawi bawk. Heng lo pawh hi A.P.J Abdul Kalam-a

chuan tam tak a rawn tarlang. Heng tuna a sawi tak te hi tun anga kan kal zel

chuan 2070 hma pan kan hmachhawn hial mai lo’ang maw? tih hial theih khawp

in kan tuihna te an kang chat mek. Tuihna siamthar hi kan va mamawh take m.

 Tin kan ramngaw sawngbawl danah pawh hian nasa taka insiamṭhat ka ngai

nasa hle bawk. Ni e ka hriat angin Mizoram mipui tam zawk hi lo neia eizawng kan

ni, nimahse he kan tlang ram lo neih kum tina insawn kual (shifting cultivation) hi

kan tun dinhmun ah chuan ngaihtuah na nasa lehzual kan sen angai takzet. Kum tin mai a lo neih na kan sawn zung zung mai chuan nakin lawkah he kan ram zim

te 21081 sq km lek hi kan vat chereu mai ang tihte pawh a hlauhthawn awm rum

rum mai. Shifting cultivation hi vawi leh khatah chuan thlak thut theih anilo a,

amaerawh chu tlak ngei hi kan mamawh tawh mamawh mai nilo in a ṭul a ni. Kan

Mizoram sawrkar hrang hrang te pawn shifting cultivation hi thlak na tur an lo dap

nasa tawh em em a. NLUP ah sum tam tak hmanral a ni tawh a, hlawhtlin pui a

nual nual chu awm mahse a tlangpui thuin a hlawhtling thawkhat lo tih tun kan

dinhmun aṭang hian a hriat theih. Tin keini kan hriat hma pawn MIP te pawh anlo

kalpui tawh nia hriat a ni, tunah hian mau chin hmang leh SEDP hmanga eizawnna

dang min dap pui an tum lek mek. Heipawh hian kan harsatna tak tak a su kiang

dawn lo niin lang ṭan. Lo neih dan kan thlak a sum lalut hnem si, environment

tichhe lo zawk si kan mamawh a ni. Chumi ti thei tur chuan zir chian na nasa tak

neih a ṭul, hemi atan pawh hian kan sawrkar in sum ṭhahnem zawk dah a, a beih a

kan beih ve tak a ṭul ang. Chutiang a kan beih ve tak tak loh chuan he kan lo neih

dan pawh hi kan thlak láwk loang tih a hriat theih. Hetia kan lo neih dan kalhmang

thlak lo a kan kalpui zel si chuan kan environment hian dawl zawh loh chin a nei

ang a, chung hun alo thlen meuh chuan kan sik leh sa in a tuar ang a, harsatna chi

hrang hrang kan hmachhawn dawn, chung hunah chuan inchir a sawt tawh dawn

silo, tun aṭang bawk hian hma kan lak ṭan angai a ni.

 Tun hnaiah Gauhati High Court Bench chuan January 27 2021 kha Mizoram

lui kam 16 tuak a ram metre 800 humhalhna dan kum 1965 aṭanga hman tawh

chu ṭhiahna thupek an rawn chhuah a, he court order ah hian Central Young Mizo

Association chuan leh pa chan changin khin let an tum nia hriat a ni, kan lui kam

te pawimawh zia hria a CYMA an rawn che hi an fakawm in an chhuanawm takzet.

Nu leh pa nih an tlin ngei mai. Hengte pawh hi keini Mizo mipuite hian kan thlawp

tlat a ṭul em em. Heng kan luikam te pawh hi a ram neitu mipui ten humhalh hi

kan tihmakmawh a ni.

 

Mizo te hian kan Ram neih chhun hi kan hmangaih tawk lo emaw tih mai tur

khawp in kum tin kan tikang duai duai a, heng kan ram tih kan hian harsatna tam

tak min rawn thlen a, harsatna pawh kan la tuar dawn chauh niiin a lang. Forest

Surveyed of India chhinchiah danin India rama ram tikang nasa ber chu North-East

state te hi ka ni a, North-East state ah pawh Mizoram hi ram tikang nasa ber kan

ni. 2020 ah FSI report danin Mizoram hmun 1300 laiah kangmei a chhuak chung

zing a 1090 hi tihpalh vang a thleng a ni a, 210 hi loneih na aṭang a kan tihkan niin report a ni. April 20-26 2021 inkar khan FSI chinchiah danin Mizoram hmung

hrang hrang 2671 lai ah kangmei a chhuak, hengte hian ngaihtuah na ti thui hle, a

kum tel mai hian kangmei kan ti chhuak zing tawlh tawlh a ang hlemai. Tuna kan

harsat na tawh mek tui harsat na te hi kan tawh tur awm reng niin alang. Tun

aṭang hian kan ram leilung hausakna te hi kan tlan ral mai ang tih a hlauhthawn

awm, kan tu leh fate tan engmah kan hnutchhiah ve dawn lo em ni?

 Kan ramngaw te kan humhalh ṭhat loh chuan chhiatna za khua kan tawk thei

tih hre reng ila a ṭha ngawt ang. Kan ramngaw kan humhalh ṭhat miau loh chuan

khaw lum lutuk te kan tuar dawn, chumai ala nilo kan ramngaw a cheng kan

nungcha te hlei hlei hian an tuar nasa dawn. Heng kan nungcha te hi ramngaw kan

tih chereu vang a an máng mai chuan kan thlai ei chhe tu rannung ṭhalo te laka

min ven saktu te an awm tawh dawn lo. Anni an awm tawh siloh chuan loneih

emaw huan thlai siam pawh a hlawk tur angin a hlawk loang, hun lokal zelah phei

chuan a tih hleihtheih loh hun ala thleng dawn. Chung hun ah chuan enge kan ei

in kan in tak ang? a tuar tu tur chu keini mihringte vek kan ni.

 A hnu khar na atan chuan tuihna siam tur hian kan tih theih tawk ramngaw

leh kan lui tui te kan humhalh a, kan luidung te kan tih bawlhhlawh loh a,

thingphun kan uar phot chuan tuihna kan siam alo ni der mai. Kan tuihnar te leh

kan ramngaw te pawimawh zia leh humhalh an ṭul zia hria in, tun aṭang in I

humhalh tlang teh ang u khai. Thing phun la I tu leh fate nunna chhanhim rawh.

Kumkhatah thingkung 5 tal phun la, tun aṭang a kum 10 ah I thingphun hlawkna

Ila tel dawn nia. Kan ramngaw leh kan tui te hian keini hringfa te hi min mamawh

lo tih hria in a mamawh zawk tute hian dimdawi takin enkawl tlang ang aw.